శిద్దాని భావగీతాలు

పల్లవి:             పరుగెత్తే ఏరు రాదు పరువంలో నాకు పోటి

                     విరబూసిన తీగ కాదు సోయగాన నాకు సాటి

చరణం:            చిటపటమను ఆ చినుకులు పాడెను నా పాటల శృతులు

                     కిలకిలమను ఆ రవములె, ఆడే నా, అందెల సవ్వడులు

                     సెలయేటి నురుగులె, నా నవ్వుల నగవులు

                     పొంగేటి మధువులవె పిలిచేటి నా పాటలు       ll పరుగెత్తే ll

చరణం:   ఎగసే తెమ్మెరలో పూసిన ఇంద్రధనుస్సే, నా మనసు

              పూదోపునూయలూపు గాలి పాడు గాంధర్వమే, నా మేని సుగంధం

              రేకులు విచ్చిన నా పడుచు సోయగమే, ఆరారు

              ఋతువులనూరించు నయగారం                           

              చెక్కిలిపై జారేటి నాదు ఆనందబాష్పమే కడలి మోజు పడేటి                              ఆణిముత్యం                                  ll పరుగెత్తే ll                                                

చరణం:             మది తలపులు మాయూరాలై ఆడగా

                      ఆ తలపుల తొలకరి తెరచాటుగా కలగన్న వాడు రాగా

                      కలిసిన మా ఎదలయలతో

                      ప్రణయానికి ప్రాణం పోస్తాం

                      పారవస్యపు పరసువేదాన్ని ఈ లోకానికి నేర్పించేస్తాం.
                                                                                ll పరుగెత్తే ll
                                                  **********